Lëvizja për Bashkim

Për Java flet Avni Klinaku, kryetar i partisë “Lëvizja për Bashkim”

KJO QEVERI DUHET TË JAPË DORËHEQJE

Qeveria e tashme është si të gjitha qeveritë e tjera të pasluftës. Shumë pak janë brengosur për qytetarin e thjeshtë. Për qytetarin e thjeshtë janë brengosur vetëm kur iu është dashur paraja ose vota e tyre.

Vedat Vllasaliu

Java: Ju keni formuar një parti me emrin “Lëvizja për bashkim” pasi që Kosova është bërë shtet; a nuk mendoni se një parti me synime për bashkim është e vonuar në ditët e sotme?

Avni Klinaku: Saktësisht, Këshilli Nismëtar për formimin e “Lëvizjes për Bashkim: është formuar në vitin 2007. Themelimin e kemi bërë para disa ditëve. Unë mendoj, jo që është e vonuar, por, tani ka ardhur momenti i kërkesës për bashkim kombëtar.

Java: Ju thoni se ka ardhur momenti, por, në të njëjtën kohë, Kosova, tashmë është shtet i pavarur me territor të përcaktuar?

Avni Klinaku: Kosova vetëm në kuptimin e territorit është shkëputur nga Serbia, përderisa ende nuk është bërë shtet i pavarur dhe sovran. Populli nuk e ushtron sovranitetin në gjithë territorin e saj, sepse jam i bindur se nëse do ta kishte ushtruar sovranitetin, atëherë ai do të bashkohej me Shqipërinë.

Edhe nëse Shqipëria nuk e dëshiron bashkimin, ne prapëseprapë do të vazhdojmë lëvizjen tonë për bashkim

Java: Nëse Shqipëria nuk e dëshiron bashkimin, çka do të bëhet me partinë e juaj?

Avni Klinaku: Ne nuk e shtrojmë këtë pyetje dhe nuk mund të shtrohet pyetja nëse Shqipëria nuk e dëshiron bashkimin. Kjo nuk mund të shtrohet për shumë arsye, qoftë edhe atyre emocionale. Pastaj, ato ekonomike, historike, etj. Megjithëse, nëse ndodh ashtu, si pyesni ju, atëherë, partia do të vazhdojë përsëri punën e saj për bashkim.

Java: Shqipëria është shprehur se e përkrah krijimin e shtetit të Kosovës dhe se nuk ka aspirata të bashkimit me Kosovën. Këto deklarata kanë qenë publike?

Avni Klinaku: Qeveritë, nuk do të thotë që e shprehin gjithmonë vullnetin e popullit. Shpesh përpiqen gjoja se po bëjmë një politikë të madhe, diplomaci të madhe, po e gënjejmë faktorin ndërkombëtar dhe këto deklarata janë deklarata diplomatike. Përndryshe, ai nuk është qëndrimi i popullit shqiptar.

Java: Cilat janë metodat që planifikoni për realizimin e programit të partisë suaj dhe çka saktësisht përmban ky program?

Avni Klinaku: Metodat që i aplikojmë, janë institucionale dhe jashtinstitucionale. Me institucionale nënkuptojmë pjesëmarrjen në zgjedhje dhe në të gjitha organet ku nuk atakohet programi ynë dhe vijat tona . Ndërkaq, me ato jashtë institucionale nënkuptojmë protesta, greva dhe mosbindje tjera qytetare. Ne i kemi përcaktuar këto mjete, pikërisht duke pasur parasysh situatën politike në Kosovë dhe mendojmë që demokracia e instaluar në Kosovë nuk mund të quhet plotësisht demokraci. Zgjedhjet nuk mund të quhen plotësisht të lira për faktin që këtu ka akoma forca ushtarake të huaja, të cilat ndikojnë psikologjikisht tek opinioni. Prandaj, kemi lënë hapësirën edhe të mjeteve jashtinstitucionale, që përmes presionit të popullit të arrihen objektivat, qoftë kombëtare, qoftë sociale.

Java: Ju po cekni praninë e forcave ushtarake të huaja, për cilat forca mendoni?

Avni Klinaku: Forcat Ndërkombëtare.

Java: Sipas statusit me të cilin funksionojnë forcat ndërkombëtare, ato janë në Kosovë për të mbrojtur Kosovën?

Avni Klinaku: Po, me të drejtë. Mirëpo, ne po flasim për aspektin e zgjedhjeve tani.

Ndërkombëtarët kanë ndikuar në zgjedhjet e fundit

Java: Sipas jush, kanë pasur ndikim, në zgjedhjet e Kosovës, forcat ndërkombëtare?

Avni Klinaku: Këto forca janë të gërshetuara edhe me forcat e qeverisjes përmes UNMIK-ut. Jo që kanë pasur ndikim - vetëm psikologjik, por, shpesh ka pasur edhe anim të drejtpërdrejtë.

Java: Sipas kësaj që thoni, ju mendoni se edhe në zgjedhjet e fundit kanë ndikuar ndërkombëtarët?

Avni Klinaku: Po, pa diskutim.

Java: Me këtë ju e kontestoni rezultatin zgjedhor. Sipas jush ky rezultat nuk është i vërtetë?

Avni Klinaku: Ne themi që nuk janë plotësisht demokratike. Nuk i hedhim poshtë në tërësi, dhe mendojmë se duhet të marrim pjesë në to, edhe pse nuk janë plotësisht zgjedhje të lira dhe qeverisja që del nga ato zgjedhje nuk është plotësisht demokratike. Prandaj, mendoj që ndihma nga populli i duhet një qeverie të këtillë.

Java: Sipas jush, çka duhet të ndryshojë dhe si mendoni se duhet të jenë demokratike këto qeveri?

Avni Klinaku: Zgjedhjet mund të bëhen vetëm atëherë kur populli bëhet Sovran. Shteti i organizon ato zgjedhje. Vetë i mban ato, me një ligj të drejtë zgjedhor, me një fushatë të drejtë zgjedhore.

Java: Sa mendoni që sot partia juaj ka mbështetje në Kosovë?

Avni Klinaku: Mendoj që sot në Kosovë mbështetja për partinë tonë është e vogël. Ne sapo jemi themeluar. Por besoj se do të aktivizohemi dhe do të rritemi shpejt.

Java: Të kthehemi tek synimi i partisë suaj dhe shtetësia e Kosovës. Krijimin e Shtetit të Kosovës brenda këtij territori e ka përkrahur edhe Hashim Thaci, kryeministër i vendit?

Avni Klinaku: Ata kanë hyrë në sfera të tilla të ingranazhit, në të cilat përdoren edhe shantazhet për ndryshim të bindjeve politike. Janë larguar, janë shmangur prej konceptit të tyre të mëhershëm. Konceptit që ka pasur edhe Lufta Çlirimtare në Kosovë.

Java: A doni të thoni që këta ish - komandantë e kanë tradhtuar qëllimin për të cilin kanë hyrë në luftë ?

Avni Klinaku: Kjo ka ndodhur edhe gjatë luftës, jo vetëm pas luftës. Pikë kyçe ka qenë Juniku. Takimi me ndërkombëtarët në Junik.

Java: A mund të na tregoni më gjerësisht, çka dhe kush e ka tradhtuar në Junik, sipas jush, konceptin e luftës?

Avni Klinaku: Fillimisht, lufta ka filluar dhe është zhvilluar për çlirimin e trojeve shqiptare. Pas aksioneve që kanë ndodhur nëpër disa stacione policore në Maqedoni, edhe pse jo shumë mirë të organizuara... e me tronditjen e Maqedonisë, do të tronditej edhe Ballkani, sidomos duke pasur parasysh brishtësinë e shtetit maqedonas. Pretendimet greko-bullgare në shtetin maqedonas, pastaj plasja që do të ndodhte edhe në vetë paktin e NATO-s, sepse Greqia dhe Turqia janë në paktin e NATO-s dhe këto dy shtete kanë pasur probleme të njëjta. Për këto arsye ka intervenuar faktori ndërkombëtar tek kreu i UÇK-së . Ka mbajtur takime të menjëhershme me kreun e UÇK-së, me pjesën politike në Zvicër. Pastaj, me pjesën ushtarake këtu dhe kështu është hequr dorë nga lufta në Maqedoni - duke ju premtuar këtyre një pavarësi për Kosovën. Dhe, këta e kanë bërë këtë lëshim atëherë.

Java: Për kënd e keni fjalën kur thoni ata që janë takuar me bashkësinë ndërkombëtare?

Avni Klinaku: Takimet kur janë mbajtur, unë kam qenë i burgosur dhe informacioni i plotë më ka munguar atëherë.

Java: Familja Jashari është familja që po ashtu e ka përkrahur krijimin e shtetit të Kosovës brenda këtij territori?

Avni Klinaku: Familja Jashari është një familje e madhe, jo vetëm për Kosovën, por për mbarë kombin. Ka bërë shumë mirë që e ka përkrahur. Ne edhe zyrtarisht e kemi përkrahur pavarësinë e Kosovës, sepse me këtë ka ndodhur një shkëputje prej Serbisë dhe në atë moment, pavarësia e Kosovës ka qenë një hap pozitiv.

Java: Por, a nuk e shihni pavarësimin e Kosovës me këta kufij edhe si një pengesë për bashkimin me Shqipërinë, të cilën e synon partia juaj?

Avni Klinaku: Në qoftë se forcat këtu lindin për një komb kosovar, apo për një komb të ndryshëm prej Shqipërisë, kjo pavarësi edhe mund të qëndrojë. Ne mendojmë që ato forca lindin shumë ngadalë, ato lindin gjatë historisë, ato duan formimin shpirtëror, kulturor dhe ato kanë gjasa shumë të vogla. Kombet nuk krijohen me vendime, me dekrete - kështu që, mendoj se pavarësimi pashmangshëm do të dërgojë në bashkimin kombëtar.

Kjo Qeveri nuk dallon aspak nga Qeveria e kaluar

Java: Cili është mendimi i juaj për Qeverinë e tashme?

Avni Klinaku: Qeveria e tashme është si të gjitha qeveritë pas luftës. Shumë pak janë brengosur për qytetarin e thjeshtë. Për qytetarin e thjeshtë janë brengosur vetëm kur iu është dashur paraja ose vota e tij. Me votën, paranë dhe jetën e tij, qytetari është abuzuar në mënyrë të pamëshirshme. Hajde ta shikojmë vetëm atë anën sociale, hiç të mos e shikojmë anën kombëtare. Mjafton vetëm çështja sociale për të vlerësuar gjendjen e qeverive të pasluftës në Kosovë.

Java: Opozita e kritikon këtë Qeveri se fshihet prapa improvizimeve, ndërkohë që Qeveria përditë publikon punët e saj, sipas tyre, të suksesshme. Kush ka të drejtë?

Avni Klinaku: Kjo qeveri më shumë merret me reklamimin e saj, sesa në kryerje të punëve. Në çdo drejtim punon me media - e jo në realitet.

Java: Çka dallon kjo Qeveri prej Qeverisë së kaluar?

Avni Klinaku: Për mendimin tonë, nuk dallon aspak.

Java: Sa mendoni se është duke i përmbushur qeveria premtimet e dhëna gjatë fushatës?

Avni Klinaku: Premtimet e dhëna gjatë fushatës, nëse i shikon në dritën e realitetit, në dritën e këtyre muajve të qeverisjes, janë qesharake. Rryma 24 orë, ujë pa ndërprerje, integrimi i pjesës veriore. Pastaj, premtimi që u bë me vendosjen e tabelave të Republikës së Kosovës në Veri nga vetë kryeministri - përderisa në Veri ai nuk u lajmërua asnjëherë.

Java: Sipas jush, çka i nevojitet kësaj qeverie?

Avni Klinaku: Kësaj qeverie i nevojitet dorëheqja.

Java: Dorëheqja?

Avni Klinaku: Në çdo aspekt ka dështuar. E shihni edhe tash çfarë reagimi ka kundër qeverisë për festat kombëtare.

As opozita nuk është me mirë se Qeveria

Java: Cili është mendimi juaj për Agjencinë Kosovare të Inteligjencës? A ka mangësi brenda këtij projektligji?

Avni Klinaku: Jo vetëm te Shërbimi i Inteligjencës, por edhe te Ministria e Mbrojtjes, kornizat për to po caktohen nga ndërkombëtarët, e jo nga ne.

Java: Ju doni të thoni që kjo agjenci nuk do të jetë në shërbimin tanë ashtu si duhet të jetë? Qeveria e Kosovës është shprehur se kjo agjenci nuk do të jetë e politizuar dhe nuk do të jetë partiake?

Avni Klinaku: Ju lutem, po ku ka qeveri që thotë se Shërbimin e Inteligjencës e kemi të politizuar.

Java: A mendoni se në këto rrethana që gjendet vendi ynë mund të krijohet kjo agjenci e tillë larg ndikimeve partiake dhe politike?

Avni Klinaku: Jo, tash për tash, nuk ka asnjë mundësi.

Java: Po për festat shtetërore, Qeveria, në projektligj, ka përcaktuar 11 festa zyrtare, ku nuk është 28 Nëntori, dita e shpalljes së pavarësisë së Shqipërisë. Po ashtu mungojnë edhe dita e dëshmorëve dhe dita e çlirimit?

Avni Klinaku: Unë mendoj që është hap i gabimeve të rënda ajo që po bën kjo Qeveri. Por, që janë të kushtëzuara drejtpërsëdrejti nga Pako e Ahtisaarit, të cilën e ka pranuar edhe Kuvendi. Ata vetëm janë duke vazhduar ta kryejnë një politikë që ne e quajmë antikombëtare.

Java: Si e vlerësoni opozitën?

Avni Klinaku: Kjo opozitë akoma nuk e kupton rolin e saj. Opozita nuk e shikon interesin e popullit, ashtu qysh nuk e shikon as Qeveria. Çdo veprim që bën, shumë lehtë identifikohet se është një luftë e egër për pushtet.

* Titujt dhe nëntitujt janë të gazetës "Java".