Dokumente

[gnadmin]

PROGRAMI POLITIK I LËVIZJES PËR BASHKIM (LB)

Lëvizja për Bashkim (LB) është organizatë politike, e cila përpiqet për zgjidhjen e çështjes së pazgjidhur shqiptare.

QËLLIMET E ORGANIZATËS

Duke pasur parasysh:

- se populli shqiptar kundër vullnetit të tij jeton i copëtuar në disa shtete dhe si pasojë çështja shqiptare mbetet e pazgjidhur, madje ajo ende nuk është shtruar drejt për zgjidhje;

- se populli shqiptar i cili jeton në Kosovë nuk e ushtron sovranitetin në territorin e vet dhe nuk i njihet e drejta e kombeve për vetëvendosje. Prandaj, Kosova edhe pas shpalljes së pavarësisë sipas Pakos së Ahtisarit mbetet pjesë e pazgjidhur e çështjes shqiptare;

- se trojet shqiptare nën Maqedoni, Serbi dhe Mal të Zi janë nën pushtim klasik dhe si rrjedhojë çlirimi i tyre nuk mund të bëhet përmes institucioneve të ndërtuara nga pushtuesit;

- se vetëm si i bashkuar në një shtet të vetëm, populli shqiptar mund t’i shfrytëzojë të gjitha potencialet e veta në funksion të zhvillimit ekonomik, politik e kulturor;

- se vetëm me zgjidhjen e drejtë dhe të plotë të çështjes shqiptare populli shqiptar bëhet faktor i paqes dhe partner i barabartë në integrimet dhe zhvillimet evropiane dhe botërore

si dhe, duke pasur parasysh të drejtën e ligjshme dhe të patjetërsueshme të kombeve për të jetuar të lirë dhe të bashkuar, në përputhje me të drejtën e kombeve për vetëvendosje:

LB-ja përpiqet për bashkimin e popullit shqiptar në një shtet të vetëm, sovran, të lirë e demokratik.

Krahas qëllimit kryesor, – bashkimit kombëtar, - dhe detyrave rreth shtrirjes së politikës së saj, LB-ja do të jetë aktive në trajtimin e çështjeve të përditshme të qytetarit, duke u përpjekur për zgjidhjen e tyre, por gjithmonë në përputhje dhe në funksion të qëllimit kryesor.

DOMOSDOSHMËRIA E EKZISTENCES

Duke qenë se:

- mungon një subjekt politik i cili e shtron drejt për zgjidhje çështjen e pazgjidhur shqiptare;

- faktorët ndërkombëtarë në çështjen e pazgjidhur shqiptare në radhë të parë i shohin interesat e veta, prandaj nuk duhet pritur që të tjerët ta zgjidhin drejt çështjen tonë:

LB-ja konsideron se për ta realizuar populli shqiptar qëllimin e vet ka nevojë për një politikë gjithëkombëtare të aftë për ta shtruar për zgjidhje dhe për ta zgjidhur drejt çështjen kombëtare. Zgjidhja e drejtë e çështjes kombëtare shqiptare, në radhë të parë, është nevojë jetike e zhvillimit të kombit shqiptar si i barabartë me të me të tjerët dhe, në radhë të dytë, krijon paqe të qëndrueshme në Ballkan e më gjerë.

MJETET DHE METODAT

Në përputhje me zhvillimin e saj politik e organizativ dhe në përputhje me rrethanat, LB-ja shtron detyra të nevojshme për jetësimin e qëllimit themelor të saj. Natyra e detyrave përcakton edhe natyrën e mjeteve dhe metodave.

LB-ja, si organizatë legale, do t’i përdorë të gjitha mjetet e luftës institucionale dhe jashtinstitucionale.

LB-ja është kundër terrorizmit si metodë lufte për realizimin e qëllimeve politike.

LB-ja është kundër nxitjes së urrejtjes raciale, kombëtare dhe fetare.

PARIME

LB-ja e konsideron popullin faktor kryesor për çlirim dhe bashkim kombëtar. Çdo përpjekje që e nënçmon faktorin e brendshëm duke e mbiçmuar faktorin e jashtëm, LB-ja e quan të gabuar e të dëmshëm.

LB-ja nuk e injoron faktorin e jashtëm, por konsideron se faktori i jashtëm mund të jetë në funksion të faktorit të brendshëm.

LB-ja e përkrah luftën e drejtë të popujve për liri dhe është kundër çdo shtypjeje të popujve, çdo kolonializmi dhe neokolonializmi.

LB-ja është kundër racizmit dhe çdo ideologjie që nxit përçarje midis popujve si dhe ndarje mbi baza fetare.

BESIME

Aspirata e popullit shqiptar për të jetuar i lirë dhe i bashkuar ka mbetur e pavdekshme përkundër përpjekjeve të pareshtura të pushtuesve për ta mbytur atë.

Një popull i organizuar mirë rreth një koncepti të drejtë politik e i vendosur në qëllimin e tij, i gjen rrethanat e favorshme ndërkombëtare dhe i realizon aspiratat e tij.

Procesi i natyrshëm dhe i pandalshëm i zhvillimit dhe integrimit të kombit shqiptar i lehtëson përpjekjet për realizimin e suksesshëm të bashkimit kombëtar.

* * *

Ky është programi politik i LB-së, i cili, me kalimin e kohës, me ndryshimin e rrethanave, mund të ndryshojë, por duke mbetur gjithmonë program i bashkimit kombëtar.

[gnadmin]

STATUTI I LËVIZJES PËR BASHKIM (LB)

KAPITULLI I

EMRI, PËRKUFIZIMI, SIMBOLET, SHTRIRJA ORGANIZATIVE


EMRI, INICIALET, PËRPKUFIZIMI

Neni 1

1. Emri i plotë i lëvizjes është: Lëvizja për Bashkim.
2. Inicialet e lëvizjes janë: LB
3. Lëvizja për Bashkim (në tekstin e mëtejshëm: LB) është organizatë politike që ka për qëllim bashkimin e trojeve me shumicë shqiptare në një shtet të vetëm - Shqipërinë.
4. LB–ja është bashkim vullnetar i individëve pa dallim feje, ideje, krahine dhe shtrese shoqërore, të cilët i bashkon qëllimi dhe pikëpamjet politike.

SHTRIRJA DHE SELIA

Neni 2

1. LB–ja ka shtrirje organizative në Kosovë.
2. Selia e LB-së është në Prishtinë.

SIMBOLI

Neni 3

1. Simboli i LB-së është i përbërë nga një shirit i kuq nën të cilin është e shkruar LËVIZJA PËR BASHKIM, përgjatë gjithë gjatësisë së shiritit, me dimensionin vertikal të shkronjave të barabartë me dimensionin e gjerësisë së shiritit.
2. Përdorimi i simbolit rregullohet me rregullore të veçantë të Këshillit të Përgjithshëm.

VULA

Neni 4

LB-ja e ka vulën e saj e cila është në formë rrethore, brenda së cilës formë përgjatë krejt harkut rrethor shënohet dy herë në trajtë simetrike Lëvizja për Bashkim, ndërsa në mes shënohet akronimi LB. Diametri i saj është tri centimetra.


KAPITULLI II

DOKUMENTET THEMELORETE LB-së

Neni 5

1. Dokumentet themelore mbi të cilat bazohet funksionimi i LB-së janë Programi dhe Statuti i saj.
2. Programi dhe Statuti janë dokumente të hapura për ndryshime dhe përmirësime kur këtë e kërkon nevoja e zhvillimit të organizatës.
3. Programin dhe Statutin e miraton dhe mund ta ndryshojë vetëm Kuvendi i LB-së.




PARIMET KRYESORE ORGANIZATIVE

Neni 6

LB-ja është krijuar, është organizuar e funksionon mbi bazën e disa parimeve kryesore:
a. organizimi mbi baza territoriale;
b. demokracia e brendshme;
c. liria e shprehjes e çdo anëtari për çdo problem që ka të bëjë me LB-në, me të zgjedhurit e saj, me dokumentet dhe zbatimin e tyre, si dhe me çështje të tjera me interes;
d. pacenueshmëria e personalitetit dhe dinjitetit të çdo anëtari;
e. kolegjialiteti dhe transparenca në marrje të vendimeve dhe në drejtimin e çdo strukture të LB-së;
f. përfaqësimi dhe vlerësimi i secilit në bazë të kontributit;
g. vendimet dhe qëndrimet politike merren me votim të hapur;
h. organet e organizatës zgjidhen me votim të fshehtë.


KAPITULLI III

ANËTARËSIMI

Neni 7

1. Anëtar i LB-së mund të jetë çdo person i cili:
a) e ka mbushur moshën 18 vjeç;
b) pranon me vullnet të lirë Programin dhe Statutin e LB-së;
c) nuk është anëtar i një subjekti tjetër politik;
d) bënë pjesë në strukturën organizative të LB-së.

2. Kandidat i LB-së konsiderohet çdo person i cili i plotëson kushtet tjera për anëtarësim, por akoma nuk bën pjesë në strukturën organizative të LB-së.



Neni 8

1. Anëtarësimi në LB bëhet sipas rregullores së veçantë e cila miratohet nga Këshilli i Përgjithshëm.
2. Anëtarëve të LB-së të cilët jetojnë jashtë territorit të Kosovës iu garantohet përfaqësimi në Kuvendin e LB-së. Mënyra e përfaqësimit në Kuvendin e LB-së dhe e zhvillimit të jetës politike përcaktohet me vendim të Këshillit të Përgjithshëm.
3. Anëtari i LB-së, i cili për arsye personale është i detyruar të largohet nga territori i Kosovës, mund ta ruajë anëtarësinë duke njoftuar me shkrim degën për adresën e tij të re si dhe duke shprehur zotimin për angazhim në përmbushjen e detyrimeve që rrjedhin nga ky Statut.



DETYRAT E ANËTARIT

Neni 9

1. Anëtari i LB-së ka për detyrë:
a. të punojë aktivisht në zbatimin e Programit të LB-së;
b. ta respektojë disiplinën e lëvizjes dhe të kontribuojë në forcimin e saj;
c. të marrë pjesë në zgjedhjet në LB duke votuar për kandidatin që dëshiron;
d. t’i pranojë dhe t’i zbatojë vendimet e shumicës;
e. t’i respektojë mendimet ndryshe, por duke iu përmbajtur gjithmonë vendimeve të shumicës;
f. të punojë për rritjen e ndikimit të LB-së;
g. ta paguajë rregullisht anëtarësinë.


TË DREJTAT E ANËTARIT

Neni 10

1. Anëtari i LB-së ka të drejtë:
a. të marrë pjesë dhe të japë kontributin e tij në hartimin dhe zbatimin e qëndrimeve dhe politikave të LB-së, Programit dhe Statutit të saj;
b. të zgjedhë dhe të zgjidhet në organet drejtuese të LB-së;
c. të informohet për aktivitetin e strukturave të LB-së dhe të shpreh qëndrimin e tij mbi to;
d. të jetë i barabartë me të gjithë anëtarët e tjerë të LB-së;
e. të largohet nga LB-ja pa qenë i detyruar të japë shpjegime për këtë çështje.

MASAT DISIPLINORE

Neni 11

1. Çdo anëtar që vepron në kundërshtim me Programin, Statutin apo vendimet e organeve të LB-së i nënshtrohet masave disiplinore.
2. Masat disiplinore janë:
a. këshillim;
b. qortim;
c. pezullim i anëtarësisë;
d. përjashtim.
3. Kërkesën për fillimin e procedurës për masë disiplinore ndaj anëtarit të LB-së e fillon organi ose anëtari i cili e ka konstatuar shkeljen.
4. Kërkesa për masë disiplinore në rastin e anëtarit të aktivit apo kryetarit të aktivit i drejtohet kryesisë së degës, ndërsa vendimin e merr këshilli i degës.
5. Kërkesa për masë disiplinore ndaj anëtarëve të këshillit të degës i drejtohet Kryetarit të LB-së, ndërsa vendimin e merr Këshilli i Përgjithshëm me shumicën e thjeshtë të votave.
6. Kërkesa për masë disiplinore ndaj anëtarëve të KP-së i drejtohet Kryetarit të LB-së, ndërsa vendimi merret nga KP-ja me 2/3 e votave të të gjithë anëtarëve të KP-së.
7. Në rast të cenimit të 2/3 të anëtarëve të organeve të zgjedhura si pasojë e shqiptimit të masave disiplinore, duhet të thirret Kuvendi i Jashtëzakonshëm. Kjo vlen për të dyja nivelet organizative.
8. Në rast të shkeljeve të rënda të përcaktuara në paragrafin 1 të këtij neni nga ana e Kryetarit të LB-së dhe kur këtë shkelje e konstaton KP i LB-së, duhet të thirret Kuvendi i Jashtëzakonshëm i LB-së.

KAPITULLI IV

ORGANIZIMI

Neni 12
1. LB-ja e ushtron aktivitetin e saj në të gjithë territorin e Kosovës dhe është organizuar në dy nivele: në nivelin lokal dhe në atë qendror.
2. Në nivelin lokal LB-ja e ka këtë organizim:
- kuvendi i degës;
- këshilli i degës;
- kryesia e degës;
- kryetari i degës;
- aktivi;
- kryetari i aktivit.
3. Në nivelin qendror LB-ja e ka këtë organizim:
- Kuvendi i LB-së;
- Këshilli i Përgjithshëm i LB-së;
- Kryetari i LB-së;
- Kryesia e KP të LB-së.

ORGANIZIMI I LB-së NË NIVEL LOKAL

KUVENDI I DEGËS

Neni 13

1. Kuvendi i degës është organi më i lartë vendimor i LB-së në nivel dege.
2. Kuvendi i degës përbëhet nga:
a. të gjithë anëtarët e Këshillit të degës;
b. delegatë nga të gjitha aktivet të cilët zgjidhen në bazë të kritereve të përcaktuara me vendim të veçantë të Këshillit të Përgjithshëm.
3. Kuvendi i degës thirret të paktën një herë në dy vjet.
4. Kuvendi i degës thirret me vendim të Këshillit të degës.
5. Për mbledhjen e kuvendit të degës, për vendin i mbajtjes, për materialet e punës dhe për rendin e ditës, anëtarët e kuvendit të degës njoftohen së paku 15 ditë përpara mbajtjes së tij.
6. Përgatitja e kuvendit të degës dhe punimet e tij bëhen sipas rregullores së veçantë të KP-së.
7. Kuvendi i degës zgjedh:
a. anëtarët e Këshilli të degës sipas rregullores së KP-së për organizimin e kuvendeve të degëve;
b. delegatët për Kuvendin e LB-së.
8. Kuvendi i Jashtëzakonshëm i degës mund të thirret me kërkesën e 1/3 të të gjitha aktiveve.

KËSHILLI I DEGËS

Neni 14

1. Drejtimi politik dhe organizativ i LB-së në nivel dege ndërmjet dy kuvendeve të degës realizohet nëpërmjet Këshillit të degës.
2. Mbledhjet e Këshillit të degës thirren dhe drejtohen nga kryetari i degës.
3. Këshilli i degës zhvillon veprimtarinë e vet në bazë të rregullores së veçantë e cila miratohet nga Këshilli i Përgjithshëm.
4. Këshilli i degës zgjedh kryetarin dhe anëtarët e kryesisë së degës.
5. Këshilli i degës diskuton dhe miraton programe pune në fusha të caktuara në përputhje me vendimet e kuvendit të degës.
6. Këshilli i degës mund të kooptojë anëtarë të rinj, por gjithmonë duke ruajtur 2/3 e anëtarëve të zgjedhur në kuvend.
7. Këshilli i degës vendos thirrjen e kuvendit të degës në bazë të rregullores së veçantë të KP-së.

KRYESIA E DEGËS

Neni 15

1. Kryesia e degës organizon punën dhe veprimtarinë e përditshme të degës së LB-së.
2. Kryesia e degës e zhvillon aktivitetin e saj mbi bazën e rregullores së veçantë të KP-së .
3. Numri i anëtarëve të Kryesisë së degës caktohet nga Këshilli i degës mbi bazën e rregullores së veçantë të KP-së.
4. Anëtarët e Kryesisë së degës zgedhen nga radhët e anëtarëve të Këshillit të degës për një periudhë 2-vjeçare nëpërmjet konkurrimit me kandidatura alternative.
5. Mbledhjet e Kryesisë së degës thirren nga kryetari i degës.

KRYETARI I DEGËS SË LB-së

Neni 16

1. Kryetari i degës është drejtuesi kryesor i degës së LB-së.
2. Kryetari i degës zgjidhet nga Këshilli i degës në bazë konkurrimi.
3. Kryetari i degës:
a. drejton dhe bashkërendon veprimtarinë e përditshme të degës së LB-së;
b. thërret dhe drejton mbledhjen e Kryesisë së degës dhe Këshillit të degës;
c. bashkërendon punën e kryesisë së degës dhe këshillit të degës;

[gnadmin]

AKTIVI

Neni 17

1. Njësia bazë e LB-së është aktivi i LB-së.
2. Aktivi formohet nga të paktën tre anëtarë të LB-së.
3. Derisa nuk plotësohet numri i mjaftueshëm për formimin e aktivit, kushdo që i plotëson kushtet tjera të anëtarësimit dhe që është në lidhje me anëtarë të LB-së, do të konsiderohet kandidat i LB-së.
4. Kandidati i LB-së zhvillon jetë aktive sipas vendimit të këshillit të degës në territorin e vendbanimit të tij.
5. Zonën e veprimit të aktivit e miraton Kryesia e degës në bazë të rregullores së veçantë të Këshillit të Përgjithshëm.
6. Mbledhja e aktivit thirret nga kryetari i aktivit.
7. Aktivi i LB-së zgjedh delegatët e tij për kuvendin e degës;
8. Aktivi i LB-së gjatë ushtrimit të aktivitetit të tij ka për detyrë:
a. të propagandojë politikën dhe qëndrimet e LB-së, në përputhje me Programin, Statutin dhe vendimet e organeve drejtuese të LB-së;
b. të punojë për shtimin e radhëve të LB-së;
c. të përpiqet ta zgjerojë ndikimin e LB-së në shtresat e ndryshme të popullsisë në njësinë territoriale në të cilën ai vepron.




KRYETARI I AKTIVIT

Neni 18

1. Kryetari i aktivit është përgjegjës për veprimtarinë e aktivit.
2. Kryetari i aktivit zgjidhet nga anëtarët e aktivit në prani të kryetarit të degës ose të njërit prej anëtarëve të Kryesisë së degës.
3. Kryetari i aktivit ka për detyrë:
a. ta organizojë veprimtarinë e LB-së në territorin e veprimit të aktivit,
b. t’i thërrasë mbledhjet e aktivit;
c. ta njoftojë me shkrim kryesinë e degës për çdo mbledhje apo aktivitet të aktivit;
d. ta mirëmbajë listën e aktivistëve të LB-së të njësisë territoriale të aktivit;

ORGANIZIMI I LB-së NË NIVEL QENDROR

KUVENDI I LB-së

Neni 19

1. Kuvendi i LB-së është organi më i lartë vendimor i LB-së.
2. Kuvendi i LB-së përbëhet nga:
a. anëtarët e Këshillit të Përgjithshëm;
b. delegatë nga të gjitha degët, në bazë të kritereve të përcaktuara me vendim të Këshillit të Përgjithshëm;
c. përfaqësues të strukturave të LB-së që jetojnë jashtë Kosovës me vendim të KP-së;
3. Kuvendi i LB-së thirret të paktën një herë në dy vjet me vendim të Këshillit të Përgjithshëm.
4. Për mbledhjen e Kuvendit, vendin e mbajtjes, kohëzgjatjen dhe rendin e ditës, anëtarët e Kuvendit njoftohen të paktën një muaj përpara mbajtjes së tij.
5. Kuvendi i LB-së drejtohet nga Kryesia e punës e Kuvendit, e cila zgjidhet nga anëtarët e Kuvendit mbi bazën e propozimit të Këshillit të Përgjithshëm dhe të delegatëve të Kuvendit.
6. Kuvendi i LB-së i zhvillon punimet në bazë të Rregullores së punës e cila miratohet nga Kuvendi i LB-së.
7. Kuvendi përgatitet nga Grupi për përgatitjen e tij që themelohet me vendim të Këshillit të Përgjithshëm.
8. Kuvendi i LB-së:
a. shqyrton dhe miraton Programin dhe Statutin ose ndryshimet në to,
b. zgjedh Kryetarin e LB-së
c. përcakton dhe miraton numrin e anëtarëve të Këshillit të Përgjithshëm,
d. zgjedh anëtarët e Këshillit të Përgjithshëm,
e. përcakton orientimet themelore politike dhe organizative të veprimtarisë së LB-së për periudhën dy vjeçare.
9. Kuvendi i Jashtëzakonshëm mund të thirret për çështje tepër të rëndësishme me kërkesën e 1/3 të të gjitha degëve ose me 2/3-at e gjithë anëtarëve të KP-së.


KËSHILLI I PËRGJITHSHËM I LB-së

Neni 20

1. Drejtimi politik dhe organizativ i LB-së midis dy kuvendeve realizohet nëpërmjet Këshillit të Përgjithshëm.
2. Anëtarët e Këshillit të Përgjithshëm zgjidhen nga Kuvendi i LB-së për një periudhë dyvjeçare, nëpërmjet konkurrimit me kandidatura alternative.
3. Këshilli i Përgjithshëm:
a. miraton rregullat e zhvillimit të zgjedhjeve në të gjitha nivelet dhe organet e LB-së;
b. diskuton dhe miraton programe pune në fusha të caktuara në bazë të vendimeve të Kuvendit;
c. miraton strukturën organizative të LB-së në përputhje me qëndrimet e Kuvendit të LB-së;
d. vendos thirrjen e Kuvendit të LB-së si dhe emëron Grupin për organizimin e Kuvendit;
e. miraton rregullore dhe udhëzime mbi mënyrën dhe praktikën e organizmit dhe funksionimit të LB-së;
f. krijon grupe të përhershme apo të përkohshme pune me anëtarë apo simpatizantë të LB-së për çështje të natyrave të ndryshme;
g. miraton rregulla mbi mënyrën e përfaqësimit në Kuvend dhe zhvillimit të jetës politike të anëtarëve të LB-së që jetojnë jashtë Kosovës;
h. miraton rregullat e përdorimit të vulës të LB-së;
i. miraton kuotizacionin e anëtarësisë;
j. miraton rregulla mbi aktivitetin financiar dhe ekonomik të LB-së;
k. në rast mosfunksionimi, thyerjesh të rënda disiplinore, apo të rezultateve të dobëta gjatë aktivitetit, vendos riorganizimin e pjesshëm ose të plotë të strukturës lokale të LB-së.
4. Këshilli i Përgjithshëm e zhvillon veprimtarinë e vet në bazë të Rregullores së Punës së KP-së e cila miratohet nga Këshilli i Përgjithshëm.
5. Mbledhjet e Këshillit të Përgjithshëm thirren me vendim të Kryetarit të LB-së. Vendi i mbajtjes, kohëzgjatja dhe rendi i ditës njoftohen të paktën 10 ditë përpara mbajtjes së saj.
6. Mbledhjet e Këshillit të Përgjithshëm drejtohen nga Kryetari i LB-së apo në mungesë të tij nga njëri prej anëtarëve të Kryesisë së KP të LB[-së.
7. Mbledhjet e KP-së janë periodike. Mbledhjet e jashtëzakonshme të KP-së mund të thirren me kërkesën e 2/3 të të gjithë anëtarëve të KP-së.
8. Këshilli i Përgjithshëm mund të bëjë kooptimin e anëtarëve të rinj, por gjithmonë duke ruajtur 3/4 e të gjithë anëtarëve të zgjedhur nga Kuvendit i LB-së.


KRYETARI I LB-së
Neni 21

1. Kryetari i LB-së është drejtuesi kryesor politik dhe organizativ i LB-së.
2. Kryetari i LB-së zgjidhet nga Kuvendi i LB-së.
3. Kryetari i LB-së i ka këto përgjegjësi:
a. Drejton dhe bashkërendon veprimtarinë e përditshme të LB-së;
b. Thërret dhe drejton mbledhjet e Kryesisë së Këshillit të Përgjithshëm dhe të KP-së;
c. Udhëheq punën e Kryesisë dhe bashkërendon punën e KP-së.
4. Në rast të mungesës së përkohshme të Kryetarit të LB-së ai zëvendësohet nga njëri prej anëtarëve të Kryesisë se KP të LB-së.
5. Në rast të mungesës së përhershme të Kryetarit të LB-së, KP i LB-së duhet ta thërrasë Kuvendin e Jashtëzakonshëm të LB-së.


KRYESIA E KËSHILLIT TË PËRGJITSHËM

Neni 22

1. Kryesia e KP të LB-së zgjidhet nga Këshilli i përgjithshëm në bazë të Rregullores së veçantë të KP të LB-së.
2. Anëtarët e kryesisë zgjidhen nga radhët e anëtarëve të Këshillit të Përgjithshëm.
3. Mbledhjet e kryesisë thirren nga Kryetari i LB-së.
4. Kryesia e KP-së e zhvillon aktivitetin e saj mbi bazën e rregullores së veçantë e cila miratohet nga Këshilli i Përgjithshëm.

KAPITULLI V

ANKESAT NDAJ VENDIMEVE

Neni 23.

1. Ndaj vendimeve që merren nga organet e LB-së mund të parashtrohen ankesa drejtpërdrejt në KP.
2. Të drejtën e ankesave ndaj vendimeve të marra nga organet e LB-së e kanë të gjithë anëtarët apo organet e saj.
3. Këshilli i Përgjithshëm formon komisione për shqyrtimin e ankesave sa herë ta shohë të nevojshme.


KAPITULLI VI

BURIMET FINANCIARE E MATERIALE DHE PËRDORIMI I TYRE

Neni 24

1. Burimet financiare të LB-së janë:
a. të ardhurat nga anëtarësia;
b. ndihmat vullnetare dhe dhuratat e anëtarëve dhe përkrahësve të LB-së;
c. ndihmat vullnetare dhe dhurata nga organizata të ndryshme;
2. Veprimtaria financiare dhe ekonomike e LB-së drejtohet nga Këshilli i Përgjithshëm.
3. Të paktën dy herë në një vit, në mbledhjet e Këshillit të Përgjithshëm, përgjegjësi për financa paraqet një raport në lidhje me aktivitetin financiar dhe ekonomik të LB-së.
4. Rregulla të hollësishme mbi aktivitetin financiar dhe ekonomik të LB-së miratohen nga Këshilli i Përgjithshëm.